“Fai prevención ”

Os accidentes laborais soben a pesar de que hai menos persoas activas (Comarca Monforte de Lemos) Publicado o 22 de agosto de 2011

→ Durante o segundo trimestre do 2011 producíronse no sur da provincia de Lugo máis accidentes laborais que no mesmo período do ano anterior, a pesar de que o número de traballadores en activo reduciuse. Portavoces de UGT cren que estes datos demostran que as empresas están a relaxar as precaucións precisas en materia de seguridade laboral e que a inspección de Traballo baixou a garda no seu labor de vixilancia.

Entre abril e xuño, producíronse nas comarcas de Monforte, Chantada e Quiroga un total de 77 accidentes laborais. A maioría foron leves, pero un que se produciu en Carballedo terminou cun traballador morto e outro no Saviñao con outro ferido grave. Monforte e Chantada foron os municipios con máis accidentes, con vinte e oito e catorce, respectivamente; e Sober, Ribas do Sil, A Pobra do Brollón e Carballedo os que tiveron menos, cun cada un.

«Desde UGT queremos recordar aos empresarios -di o secretario comarcal deste sindicato, Mario Docasar- que gastar diñeiro en seguridade non é un custo, senón un investimento».

UGT organizará o mes que vén en Monforte un curso de prevención de riscos.

FONTE: 20-08-2011 A VOZ DE GALICIA